កម្មករ​បន្ត​ធ្វើ​បាតុកម្ម​មុខ​ក្រសួង​ការងារ​និង​បិទ​ផ្លូវ​ជាតិ​មួយ​ចំនួន

ដោយ ម៉ម មុនីរតន៍ និង វោហារ ជាតិ
2013-12-31
អ៊ីម៉ែល
មតិ
Share
បោះពុម្ព
កម្មករ​ប្រមូល​ផ្ដុំ​គ្នា​បិទ​ផ្លូវ​សហព័ន្ធ​រុស្ស៊ី មុខ​ក្រសួង​ការងារ ទាមទារ​សុំ​ឡើង​ប្រាក់​ខែ​គោល ១៦០​ដុល្លារ នៅ​ព្រឹក​ថ្ងៃ​ទី​៣១ ធ្នូ ឆ្នាំ​២០១៣។
កម្មករ​ប្រមូល​ផ្ដុំ​គ្នា​បិទ​ផ្លូវ​សហព័ន្ធ​រុស្ស៊ី មុខ​ក្រសួង​ការងារ ទាមទារ​សុំ​ឡើង​ប្រាក់​ខែ​គោល ១៦០​ដុល្លារ នៅ​ព្រឹក​ថ្ងៃ​ទី​៣១ ធ្នូ ឆ្នាំ​២០១៣។
RFA/Mom Sophon

ក្រុម​បាតុករ​បាន​ស្រែក​ទាមទារ​ឲ្យ​លោក​រដ្ឋមន្ត្រី​ក្រសួង​ការងារ​និង​បណ្ដុះបណ្ដាល​វិជ្ជាជីវៈ អ៊ិត សំហេង ចេញ​មុខ​មក​​ដោះស្រាយ​រឿង​ការ​សុំ​ដំឡើង​ប្រាក់​ខែ​របស់​កម្មករ។

ប្រធាន​សម្ព័ន្ធ​សហជីព​ជាតិ​នៃ​ឧស្សាហកម្ម​វាយនភណ្ឌ​កាត់​ដេរ​កម្ពុជា អ្នកស្រី ម៉ម ញឹម បញ្ជាក់​នៅ​ថ្ងៃ​ទី​៣១ ធ្នូ ថា កាត​តវ៉ា​របស់​កម្មករ​នៅ​មុខ​ក្រសួង​ការងារ​និង​បណ្ដុះបណ្ដាល​វិជ្ជាជីវៈ​តាំង​ពី​ព្រឹក​មក​ទល់​រសៀល​ថ្ងៃ​នេះ មិន​ទាន់​មាន​មន្ត្រី​ណា​ម្នាក់​ចេញ​មុខ​មក​ដោះស្រាយ​នៅ​ឡើយ​ទេ។ បន្ទាប់​ពី​ការ​តវ៉ា​ពុំ​ទទួល​បាន​ដំណោះស្រាយ ក្រុម​កម្មករ​បាន​រំសាយ​ការ​តវ៉ា​នៅ​រសៀល​ថ្ងៃ​នេះ។

នៅ​ថ្ងៃ​ទី​៣១ ធ្នូ នេះ​ដែរ ក៏​មាន​កម្មករ​រាប់​រយ​នាក់​ទៀត​ធ្វើ​បាតុកម្ម​ទាមទារ​ប្រាក់​ខែ​គោល​តាម​រោងចក្រ​នានា​។

លោក ជា មុនី ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា បញ្ជាក់​ថា កម្មករ​ស្ទើរ​គ្រប់​កន្លែង​នៅ​រាជធានី និង​ជាយ​រាជធានី​ភ្នំពេញ នៅ​បន្ត​ធ្វើ​បាតុកម្ម​ទាមទារ​ប្រាក់​ខែ​គោល​ត​ទៅ​ទៀត ដូចជា​កម្មករ​រោងចក្រ ផាក ស៊ុន (Pak Sun Knitting) ប្រមាណ ៦០០​នាក់ ធ្វើ​បាតុកម្ម​បិទ​ផ្លូវ​ជាតិ​លេខ​២ ម្ដុំ​ចាក់អង្រែ ក្រៅ​ពី​នេះ មាន​កម្មករ​រោងចក្រ​ផ្សេង​ទៀត ធ្វើ​បាតុកម្ម​មុខ​រោងចក្រ ហើយ​កម្មករ​ខ្លះ​ជួនកាល​​បិទ​ផ្លូវ​ជាតិ ដូច​ជា ក្នុង​ម្ដុំ​ផ្លូវ​ជាតិ​លេខ​៥ ក្នុង​ខណ្ឌ​ឫស្សីកែវ កម្មករ​រោងចក្រ​តាម​ផ្លូវ​ជាតិ​លេខ​៤ លេខ​៦ ជាដើម។

មេ​សហជីព​សម្រេច​ផ្អាក​ធ្វើ​បាតុកម្ម​មួយ​ថ្ងៃ

ក្រុម​មេដឹកនាំ​សហជីព​ធំៗ សម្រេច​ចិត្ត​រំសាយ​បាតុករ​ដែល​តែង​ប្រមូលផ្ដុំ​នៅ​ខាង​មុខ​ក្រសួង​ការងារ ដើម្បី​ទុក​ឲ្យ​កម្មករ​បាន​ឈប់​សម្រាក​បុណ្យ​ចូល​ឆ្នាំ​សកល​មួយ​ថ្ងៃ។

ប្រធាន​សហភាព​សហជីព​កម្ពុជា ឲ្យ​ដឹង​ថា បាតុកម្ម​ដែល​តែង​ជួបជុំ​នៅ​មុខ​ក្រសួង​ការងារ ដែល​ទាមទារ​ដំឡើង​ប្រាក់​ខែ​គោល​ចំនួន ១៦០​ដុល្លារ នឹង​ត្រូវ​ផ្អាក​រយៈពេល​មួយ​ថ្ងៃ ដើម្បី​ទុក​ឱកាស​ឲ្យ​កម្មករ​បាន​ឈប់​សម្រាក ចូល​ឆ្នាំ​សកល ប៉ុន្តែ​នៅ​ដើម​សប្ដាហ៍​ក្នុង​ឆ្នាំ​២០១៤ កម្មករ​នឹង​ធ្វើ​បាតុកម្ម​ដូច​ដើម​ឡើង​វិញ នៅ​តាម​គោលដៅ​នៃ​រោងចក្រ​នីមួយៗ។

លោក រ៉ុង ឈុន ប្រធាន​សមាគម​គ្រូបង្រៀន​កម្ពុជា​ឯករាជ្យ និង​ជា​ប្រធាន​សហភាព​សហជីព​កម្ពុជា មាន​ប្រសាសន៍​នៅ​ថ្ងៃ​ទី​៣១ ខែ​ធ្នូ មុន​ការ​រំសាយ​កម្មករ​នៅ​មុខ​ក្រសួង​ការងារ​ថា នៅ​ថ្ងៃ​ទី​១ ខែ​មករា កម្មករ​នៅ​តាម​បណ្ដា​រោងចក្រ​ដែល​បិទ​ទ្វារ​ក្នុង​ពេល​កន្លង​ទៅ​នេះ នឹង​ត្រូវ​ផ្អាក​បណ្ដោះអាសន្ន។ លោក​អះអាង​ថា ការ​រំសាយ​កម្មករ​នេះ គឺ​បំណង​ដើម្បី​ឲ្យ​ពួក​គេ​បាន​ឈប់​សម្រាក​នៅ​ថ្ងៃ​បុណ្យ​ចូល​ឆ្នាំ​សកល។ លោក​បន្ត​ថា នៅ​ថ្ងៃ​ទី​២ ខែ​មករា បាតុកម្ម​នឹង​ផ្ទុះ​ឡើង​វិញ ហើយ​ការ​កម្រើក​ជា​ថ្មី​ទៀត​នេះ គឺ​មាន​លក្ខណៈ​ទ្រង់ទ្រាយ​ធំ ដើម្បី​ដាក់​សម្ពាធ​ឲ្យ​រដ្ឋាភិបាល​ធ្វើ​សេចក្ដី​សម្រេច​មួយ​ដូច​អ្វី​ដែល​កម្មករ​បាន​ទាមទារ គឺ​ប្រាក់​ខែ​គោល ១៦០​ដុល្លារ។

ចំណែក​កម្មការិនី​មួយ​ចំនួន​ដែល​បាន​ចូល​រួម​ធ្វើ​បាតុកម្ម​នៅ​ខាង​មុខ​ក្រសួង​ការងារ​ថ្លែង​ថា ប្រសិន​បើ​រដ្ឋាភិបាល និង​ជំនាញ​ពាក់ព័ន្ធ នៅ​តែ​មិន​ដោះស្រាយ​ទៅ​តាម​ការ​ទាមទារ​ទេ បាតុកម្ម​នេះ​នឹង​បន្ត​អូស​បន្លាយ​ដល់​ទី​បញ្ចប់។

កម្មករ​រាប់​ពាន់​នាក់​បាន​បិទ​ផ្លូវ​ចាប់​ពី​ព្រឹក​ថ្ងៃ​ទី​៣១ ខែ​ធ្នូ រហូត​ដល់​រសៀល​ទើប​សម្រេច​​រំសាយ​ទៅ​វិញ។ ចំណែក​នៅ​លើ​កំណាត់​មហា​វិថី​សហព័ន្ធ​រុស្ស៊ី ដែល​នៅ​ខាង​មុខ​ក្រសួង​ការងារ​វិញ សកម្មភាព​នៃ​ការ​ធ្វើ​ចរាចរណ៍​ត្រូវ​កាត់​ផ្ដាច់ ដោយ​កម្លាំង​កម្មករ ព្រះ​សង្ឃ និង​និស្សិត។ ទន្ទឹង​នឹង​​នេះ សកល​វិទ្យាល័យ​មួយ​ចំនួន នៅ​ក្បែរ​ទី​តាំង​ប្រមូល​ផ្ដុំ​នោះ ក៏​ត្រូវ​បិទ​ទ្វារ​ដែរ។ ជាង​នេះ​ទៀត កម្លាំង​ជា​ច្រើន​រយ​នាក់​នៅ​ផ្នែក​ខាង​កើត ក្បែរ​មន្ទីរពេទ្យ​កុមារ​ជាតិ ត្រូវ​គេ​ពង្រាយ​យ៉ាង​ស្អេកស្កះ ដើម្បី​ទប់ស្កាត់​កម្លាំង​កម្មករ​ក្នុង​បំណង​ណា​មួយ​សំដៅ​ទៅ​រក​ចំណុច​សំខាន់ៗ​របស់​រដ្ឋាភិបាល។

វិទ្យុ​អាស៊ីសេរី​ពុំ​អាច​ទាក់ទង​មន្ត្រី​នៃ​ក្រសួង​ការងារ​ដើម្បី​បំភ្លឺ​ជុំវិញ​ការ​ទាមទារ​របស់​កម្មករ​បាន​ទេ នៅ​ថ្ងៃ​ទី​៣១ ខែ​ធ្នូ។

យ៉ាង​ណា​ក៏​ដោយ លិខិត​ចុះ​ថ្ងៃ​ទី​៣០ ខែ​ធ្នូ ដែល​មាន​លោក ង៉ោ ហុងលី ជា​រដ្ឋលេខាធិការ​នៃ​​ទីស្ដីការ​គណៈរដ្ឋមន្ត្រី ផ្ញើ​ជូន​រដ្ឋមន្ត្រី​ក្រសួង​ការងារ មាន ៤​ចំណុច។ ក៏ប៉ុន្តែ ចំណុច​ដែល​សំខាន់​គឺ​ព្រមាន​ចាត់​វិធានការ​តាម​ផ្លូវ​ច្បាប់​ទៅ​តុលាការ ប្រឆាំង​សហជីព​ចំនួន ៤ និង​សមាគម​មួយ​របស់​លោក រ៉ុង ឈុន បើ​សហជីព​និង​សមាគម​ទាំង​នេះ នៅ​តែ​បន្ត​រឹងរូស​ដឹកនាំ​ធ្វើ​បាតុកម្ម​បន្ត​ទៀត។ លិខិត​ព្រមាន​បន្ត​ថា ការ​ទាមទារ​ដំឡើង​ដល់ ១៦០​ដុល្លារ​ភ្លាមៗ​គឺ​មិន​អាច​អនុវត្ត​បាន​ឡើយ។

ចំណែក​លោក រ៉ុង ឈុន អះអាង​ថា លោក​និង​សហជីព​ចំនួន ៤ ផ្សេង​ទៀត នឹង​មិន​ញញើត​ចំពោះ​ការ​ព្រមាន​នេះ​ជា​ដាច់​ខាត។ ដោយ​ឡែក​ក្រុម​កម្មករ​បាន​ព្រមាន​ទៅ​រដ្ឋាភិបាល​វិញ​ដែរ​ថា បើ​នៅ​តែ​ជ្រើសរើស​ការ​ចាប់ចង​ប្រឆាំង​ប្រធាន​សហជីព​ទៀត មហា​បាតុកម្ម​ធំ​នឹង​ផ្ទុះ​ឡើង។ លោក អំ សំអាត អ្នក​គ្រប់គ្រង​បច្ចេកទេស​ស៊ើប​អង្កេត​របស់​អង្គការ​លីកាដូ ដែល​ឃ្លាំមើល​ការ​ធ្វើ​បាតុកម្ម​ថ្លែង​ថា រដ្ឋាភិបាល​គប្បី​ដោះស្រាយ​ដោយ​សន្តិវិធី ជា​ជាង​ការ​ប្រើប្រាស់​កម្លាំង​ដើម្បី​បង្ក្រាប។

មន្ត្រី​សហជីព​ឲ្យ​ដឹង​ថា គិត​មក​ដល់​ពេល​នេះ មាន​រោងចក្រ​ប្រមាណ​ជាង ៣០០​ហើយ​ត្រូវ​បិទ​ទ្វារ។

ទោះ​ជា​បែប​ណា លិខិត​ចុះ​ថ្ងៃ​ទី​៣១ ខែ​ធ្នូ របស់​លោក អ៊ិត សំហេង រដ្ឋមន្ត្រី​ក្រសួង​ការងារ បាន​សម្រេច​ផ្ដល់​ប្រាក់​ខែ​គោល ដល់​កម្មករ​និយោជិក​ផ្នែក​វាយនភណ្ឌ​កាត់ដេរ​សំលៀក​បំពាក់ និង​ផលិត​ស្បែក​ជើង​ពី ៨០ ទៅ ១០០​ដុល្លារ ក្នុង​មួយ​ខែ សម្រាប់​ឆ្នាំ​២០១៤ បន្ថែម​លើ​ប្រាក់​អត្ថប្រយោជន៍​ផ្សេង​ទៀត​ដែល​មាន​ស្រាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (6)
Share

david

ពី un of new york

all of Cambodia do on right
we area will be hind not be scare
we want to see how Cambodia people get up
what they true do what they need.

Dec 31, 2013 07:03 PM

អ្នក​អាន​អនាមិក

ឥឡូវទំនប់បាក់ហើយ, ទាំងមន្ត្រី ទាំងកម្មករ-កសិករ ទូរទាំងប្រទេសកំពុងងើបឡើងទាមទារនូវសិទ្ធិ សេរីភាព ជីវភាពរបស់ខ្លួនក្រោមការជិះជាន់ និងឈ្លានពានពីប្រទេសជិតខាង ដែលគេមានបំណងបំបាត់ទឹកដី និងពូជសាស្រ្តខ្មែរ ក្រោមភាពថាជួយខ្មែរឲ្យរូចពីវាលពិឃាដរបស់ពួកខ្មែរក្រហមកុម្មុយនិស្ត្រ ។ តែវានៅតែយកជនដែលមានដៃប្រឡាក់ឈាមខ្មែរមកបន្តុបធ្វើជាអាយ៉ងបំពេញបំណងគេដដែល​។ ជ័យោ ! មហាសាមគ្គីប្រជាជនខ្មែរ,

Dec 31, 2013 04:28 PM

អ្នក​អាន​អនាមិក

Now the children and grand children are teaching the parent and grand parent that most of them working in the government job. Like the young men and women said in the protest "if you don't know how to solve problem, please step down and let someone else do it". "Hun Sen step down ........".
I has never seen our Khmer leader (Hun Sen) is so greedy in power. He has no heart, no brain, and no soul. Where he comes from! He stays for what! He works for who! Why Khmer unfortunately have the leader like this! ??????

Dec 31, 2013 04:22 PM

PP

CPP wants to accuse worker representatives of peaceful protesters. It is a shame for CPP that always has a culture to paint color on people. CPP paints color and International community demands CPP to wash the color all the times. It is cheap tricks and make CPP worthless due to its ignorance.

Dec 31, 2013 11:04 AM

Peuv

These poor factory workers have the right to demonstrate and to demand the raise of their wages. To demonstrate in dignity is better than to die of starvation. Why can they not demonstrate while Hun Sen and Bun Rany have pile of dollars to pay for their first class travel in private planes hopping from country to country look out for a beach to sunbathe? How do these couple can afford these luxuries while the poor workers do not know where their next meals are?

Dec 31, 2013 10:28 AM

មើល​មតិ​ទាំង​អស់.

គេហទំព័រ​ទាំងមូល