ពលរដ្ឋ​ខេត្ត​ពោធិ៍សាត់​ត្អូញត្អែរ​ពី​បញ្ហា​ផ្លូវ​ខូច​ពិបាក​ធ្វើ​ដំណើរ

ដោយ ជិន ជេដ្ឋា
2016-09-15
អ៊ីម៉ែល
មតិ
Share
បោះពុម្ព
ផ្លូវ​ក្រាល​ក្រួស​ក្រហម​ចេញ​ពី​ផ្លូវ​ជាតិ​លេខ​៥ ក្បែរ​សាលា​ឃុំ​អូរសណ្ដាន់ ស្រុក​ក្រគរ ឆ្ពោះ​ទៅ​ភូមិ​អូរតាប្រុក ឃុំ​អូរសណ្ដាន់ ក្នុង​ខេត្ត​ពោធិ៍សាត់។ រូបថត​ថ្ងៃ​ទី​១៥ កញ្ញា ឆ្នាំ​២០១៦
ផ្លូវ​ក្រាល​ក្រួស​ក្រហម​ចេញ​ពី​ផ្លូវ​ជាតិ​លេខ​៥ ក្បែរ​សាលា​ឃុំ​អូរសណ្ដាន់ ស្រុក​ក្រគរ ឆ្ពោះ​ទៅ​ភូមិ​អូរតាប្រុក ឃុំ​អូរសណ្ដាន់ ក្នុង​ខេត្ត​ពោធិ៍សាត់។ រូបថត​ថ្ងៃ​ទី​១៥ កញ្ញា ឆ្នាំ​២០១៦
RFA/Chin Chetha

ពលរដ្ឋ​ឃុំ​អូរសណ្ដាន់ ស្រុក​ក្រគរ ខេត្ត​ពោធិ៍សាត់ ត្អូញត្អែរ​ពី​បញ្ហា​ផ្លូវ​ខូច​លំបាក​ធ្វើ​ដំណើរ​ទៅ​មន្ទីរពេទ្យ និង​ទៅ​ផ្សារ។ ក្រុម​អ្នក​ភូមិ​បារម្ភ​ថា បើ​មាន​អ្នក​ភូមិ​ឈឺ​ធ្ងន់ធ្ងរ​ត្រូវ​បញ្ជូន​ទៅ​មន្ទីរពេទ្យ​ជា​បន្ទាន់​នោះ អាច​នឹង​ដាច់​ខ្យល់​ស្លាប់​មុន​នឹង​បញ្ជូន​ទៅ​ដល់​មន្ទីរពេទ្យ។ ប៉ុន្តែ​អាជ្ញាធរ​អះអាង​ថា ផ្លូវ​ក្រួស​ក្រហម​ដែល​កំពុង​ខូចខាត​នេះ នឹង​ត្រូវ​ស្ថាបនា​ថ្មី​ដោយ​ក្រាល​កៅស៊ូ។

អ្នក​ភូមិ​ជា​ច្រើន​ភូមិ​ត្អូញត្អែរ​លំបាក​ធ្វើ​ដំណើរ​កាត់​ផ្លូវ​ក្រាល​ក្រួស​ក្រហម​ប្រមាណ ៧​គីឡូម៉ែត្រ​ចេញ​ពី​ផ្លូវ​ជាតិ​លេខ​៥ ក្បែរ​សាលា​ឃុំ​អូរសណ្ដាន់ រហូត​ដល់​ភូមិ​អូរតាប្រុក នៃ​ឃុំ​អូរសណ្ដាន់។

ពលរដ្ឋ​ម្នាក់​នៅ​ភូមិ​ថ្នឹង លោក សោម ទី មាន​ប្រសាសន៍​នៅ​ថ្ងៃ​ទី​១៥ ខែ​កញ្ញា ថា ពីរ​បី​ឆ្នាំ​ហើយ​ដែល​ផ្លូវ​នេះ​ខូច ប៉ុន្តែ​រយៈ​ពេល​មួយ​ឆ្នាំ​ចុង​ក្រោយ​នេះ​ផ្លូវ​មាន​ជង្ហុក​ធំៗ និង​កន្លែង​ខ្លះ​មាន​ទឹក​ដក់​ធ្វើ​ដំណើរ​រអិល​ដួល​ទៀត​ផង។ អ្នក​ភូមិ​ដែល​ធ្វើ​ដំណើរ​ឆ្លង​កាត់​ផ្លូវ​នេះ​រាល់​ថ្ងៃ​មាន ៦​ភូមិ ហើយ​ពលរដ្ឋ​ខ្លះ​ត្រូវ​ឡើង​ចុះ​ទិញ​អីវ៉ាន់​ពី​ផ្សារ​មក​លក់​ដូរ​ញឹកញាប់​នៅ​ផ្ទះ មាន​ការ​លំបាក​ដឹក​អីវ៉ាន់​ឆ្លងកាត់​ផ្លូវ​នេះ​ណាស់៖ «សូម្បី​តែ​យើង​មាន​ជំងឺ ឬ​អ្នក​ស្រុក​មាន​ជំងឺ ត្រូវ​ទៅ​ព្យាបាល​នៅ​មន្ទីរពេទ្យ​ក៏​យើង​យ៉ាប់​ទៅ។ បើ​សិន​ណា​អត់​ភ្លៀង​អា​ហ្នឹង​អាច​បន្តិច បើ​ថា ភ្លៀង​ដូច​មិញ​មិន​ដឹង​ធ្វើ​ដំណើរ​ទៅ​យ៉ាង​ណា​យ៉ាង​ណី ពិបាក​មែន​ទែន។ សំណូមពរ​ថា រាជរដ្ឋាភិបាល​ជួយ​កសាង​ផ្លូវ​ល្អ​មក ដើម្បី​ឲ្យ​ប្រជាពលរដ្ឋ (ស្រួល​ធ្វើ​ដំណើរ) សូម្បី​កសិករ​ដែល​ធ្វើ​ស្រែ​ចម្ការ ពេល​បាន​របស់របរ​ងាយ​ស្រួល​ដឹក​យក​ទៅ​លក់ដូរ​នៅ​ទីផ្សារ តែ​បើ​យើង​អត់​ផ្លូវ​ប្រជា​កសិករ​ទៅ​លក់ដូរ ឬ​យក​សម្ភារៈ​មក​លក់ដូរ​ក៏​ពិបាក​ធ្វើ​ដំណើរ»

ចំណែក​ពលរដ្ឋ​ម្នាក់​ទៀត លោកស្រី នុត ម៉ារិន ថា ស្ថានភាព​លំបាក​ក្នុង​ការ​ធ្វើ​ដំណើរ​រាល់​ថ្ងៃ​នេះ​គាត់​អាច​ទ្រាំ​បាន ព្រោះ​កន្លង​ទៅ​ផ្លូវ​នោះ​មាន​សភាព​លំបាក​ជាង​នេះ​ទៅ​ទៀត។ លោកស្រី​ថា រាល់​ឆ្នាំ មេ​ឃុំ និង​ព្រះចៅ​អធិការ​វត្ត បាន​ដឹកនាំ​ពលរដ្ឋ និង​ព្រះសង្ឃ​ជួល​ជុល​ផ្លូវ​នេះ​ដែរ ដោយ​កាប់​ដី​ដាក់​លើ​រទេះ​រួច​ដើរ​ចាក់​តាម​ជង្ហុក ឬ​រណ្ដៅ​ដក់​ទឹក ដើម្បី​សម្រួល​ដល់​ការ​ធ្វើ​ដំណើរ​របស់​ពលរដ្ឋ៖ «ពី​ដើម​មក​វា​លំបាក​ជាង​ហ្នឹង​ទៀត! មក​រាល់​ថ្ងៃ​ហ្នឹង​ដូច​ថា លំបាក​ម៉េច​ក៏​គ្រាន់​ជាង​មុន។ ពី​មុន​ផ្លូវ​ស​រអិល​មុខ​រអិល​ក្រោយ រាល់​ថ្ងៃ​បាន​ផ្លូវ​ក្រួស​ក្រហម​ហើយ​គ្រាន់​តែ​ថា វា​មាន​ជង្ហុក​បន្តិច​ដោយ​ឡាន​បើក​ជានិច្ចកាល​អ៊ីចឹង​ទៅ​ណា។ ទើប​ឃើញ​ឆ្នាំ​នេះ​ទេ​លំបាក​ខ្លាំង រាល់​ឆ្នាំ​មក​លោក​មេ​ឃុំ​តែងតែ​នាំ​ប្រជា​ពលរដ្ឋ​ជួសជុល​មក»

ឆ្លើយ​តប​បញ្ហា​នេះ​ជំទប់​ទី​១ ឃុំ​អូរសណ្ដាន់ លោក គឹម ប៊ុនសម្បត្ដិ បញ្ជាក់​ថា ផ្លូវ​លំ​មួយ​ខ្សែ​ប្រវែង ៨​គីឡូម៉ែត្រ​នេះ បាន​ធ្វើ​តាំង​ពី​ឆ្នាំ​១៩៩៥ ហើយ​បាន​ជួសជុល​ពីរ​ដង គឺ​ម្ដង​នៅ​ឆ្នាំ​២០០២ និង​ម្ដង​ទៀត​នៅ​ឆ្នាំ​២០០៧។ លោក​ថា ការ​ជួសជុល​បន្ទាប់បន្សំ​រយៈ​ពេល​ចុង​ក្រោយ​នេះ គឺ​ដើម្បី​រង់ចាំ​គម្រោង​ស្ថាបនា​ផ្លូវ​ក្រាល​កៅស៊ូ​របស់​ក្រសួង​អភិវឌ្ឍន៍​ជនបទ​ចេញ​ពី​ផ្លូវ​ជាតិ​លេខ​៥ ឆ្ពោះ​ទៅ​តភ្ជាប់​ផ្លូវ​កៅស៊ូ​មួយ​ខ្សែ​ទៀត​ឋិតនៅ​ខាង​លិច​ភូមិ​អូរតាប្រុក នៃ​ឃុំ​អូរ​សណ្ដាន់ នៅ​ចុង​ឆ្នាំ​២០១៦ ឆាប់ៗ​នេះ៖ «នៅ​រង់ចាំ​ខាង​ក្រសួង​គេ​ធ្វើ​ហ្នឹង​ហើយ! ដល់​ក្រសួង​ធ្វើ​ទៅ យើង​ទុក​លុយ​ហ្នឹង​ទៅ​ធ្វើ​ផ្លូវ​តាម​ឃុំ​របស់​យើង​វិញ បាន​ន័យ​ថា របស់​ក្រសួង​ទុក​ឲ្យ​ក្រសួង ហើយ​អា​លុយ​មូលនិធិ​របស់​ឃុំ​ធ្វើ​ផ្លូវ​ផ្សេងៗ​ពី​ហ្នឹង»

ផ្លូវ​មួយ​ខ្សែ​នេះ ​ជា​សរសៃ​ឈាម​យ៉ាង​សំខាន់​របស់​ពលរដ្ឋ​រស់នៅ​ប៉ែក​ខាង​ក្រោម​ផ្លូវ​ជាតិ​លេខ​៥ នៃ​ឃុំ​អូរសណ្ដាន់ ដើម្បី​ដឹក​ជញ្ជូន​កសិផល​លក់ដូរ​នៅ​ផ្សារ​ក្រគរ ឬ​ផ្សារ​ពោធិ៍សាត់ និង​ចេញ​ចូល​ព្យាបាល​ជំងឺ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

If you vote for me in 2018 I will do for you this road,but if you don't I am sorry I will not haha.

Sep 16, 2016 09:31 PM

អ្នក​អាន​អនាមិក

ពី USA

Why Hun Sen thinking about soldiers blocking CNRP than thinking about the road got damaged because he thinking about himself, about protecting his seat, protecting Hun family wealth, than Khmer people lives. Go ahead stupid soldiers protecting your Hun Sen than your family and your country.

Sep 16, 2016 02:06 AM

គេហទំព័រ​ទាំងមូល