ក្រសួង​មហាផ្ទៃ​បង្ហាញ​អត្តសញ្ញាណ​មេ​បណ្ដាញ​បោកប្រាស់​លុយ​ពលរដ្ឋ​៦០​លាន​ដុល្លារ

ដោយ ឡេង ម៉ាលី
2017-05-30
អ៊ីម៉ែល
មតិ
Share
បោះពុម្ព
អត្តសញ្ញាណ​មេ​បណ្ដាញ ៤​រូប ដែល​បោកប្រាស់​លុយ​ចំនួន ៦០​លាន​ដុល្លារ ត្រូវ​បាន​ក្រសួង​មហាផ្ទៃ បង្ហាញ​ក្នុង​សន្និសីទ​សារព័ត៌មាន​នា​ក្រសួង​មហាផ្ទៃ ព្រឹក​ថ្ងៃ​ទី​៣០ ខែ​ឧសភា ឆ្នាំ​២០១៧។
អត្តសញ្ញាណ​មេ​បណ្ដាញ ៤​រូប ដែល​បោកប្រាស់​លុយ​ចំនួន ៦០​លាន​ដុល្លារ ត្រូវ​បាន​ក្រសួង​មហាផ្ទៃ បង្ហាញ​ក្នុង​សន្និសីទ​សារព័ត៌មាន​នា​ក្រសួង​មហាផ្ទៃ ព្រឹក​ថ្ងៃ​ទី​៣០ ខែ​ឧសភា ឆ្នាំ​២០១៧។
RFA/Leng Maly

មន្ត្រី​ក្រសួង​មហាផ្ទៃ នៅ​ថ្ងៃ​ទី​៣០ ឧសភា បង្ហាញ​អត្តសញ្ញាណ​មេ​បណ្ដាញ ៤​រូប ដែល​បោកប្រាស់​លុយ​ចំនួន ៦០​លាន​ដុល្លារ។ ពលរដ្ឋ​ដែល​ចាញ់​បោក​បណ្ដាញ​នេះ គឺ​តាម​រយៈ​ចូល​លុយ​ទិញ​ភាគហ៊ុន​វិនិយោគ ដើម្បី​យក​ប្រាក់​ចំណេញ។

ប្រធាន​នាយកដ្ឋាន​សន្តិសុខ​កណ្ដាល​នៃ​ក្រសួង​មហាផ្ទៃ លោក ឌី វិជ្ជា បង្ហាញ​ថា អត្តសញ្ញាណ​មេ​បណ្ដាញ​បោកប្រាស់​លុយ​ពលរដ្ឋ​ទាំង ៤​រូប គឺ​មាន​ជនជាតិ​ម៉ាឡេស៊ី ១​រូប និង​ខ្មែរ ៣​រូប។ ក្នុង​នោះ​មាន​ឈ្មោះ ឡុង សម្បត្តិ ហួត សុវណ្ណ ជីហ្គោ សាលី និង​ជនជាតិ​ម៉ាឡេស៊ី ឈ្មោះ តាន់ សេជិន ហៅ ស៊ាន តាន់។ លោក​បញ្ជាក់​ថា អ្នក​ទាំង​បី​មាន​ដីកា​ពី​តុលាការ​បង្គាប់​ឲ្យ​ចូល​ខ្លួន«គាត់​ម៉ាឡេស៊ី នេះ គឺ​អាច​ថា​ជា​ប្រធាន​អង្គការ​ក៏​បាន ប្រធាន​ក្រុមហ៊ុន​ក៏​បាន ហើយ​បុគ្គល​ប៉ុន្មាន​នាក់​អម្បាញ់មិញ​នេះ គាត់​ជា​ដៃ​ជើង ជា​អ្នក​ដើរ​តាម​ខេត្ត​ជួប​ជាមួយ​ពលរដ្ឋ»

រដ្ឋលេខាធិការ​ក្រសួង​មហាផ្ទៃ លោក ងី ច័ន្ទ្រផល ឲ្យ​ដឹង​នៅ​ក្នុង​សន្និសីទ​សារព័ត៌មាន​ថា រហូត​មក​ដល់​ព្រឹក​ថ្ងៃ​ទី​៣០ ឧសភា ក្រសួង​មហាផ្ទៃ បាន​ទទួល​ពាក្យ​បណ្ដឹង​ធំៗ​ចំនួន​៤ តំណាង​ឲ្យ​ពលរដ្ឋ .៤៣០​នាក់ ដែល​ចាញ់​បោក​បណ្ដាញ​ប្រមូល​លុយ​ទៅ​វិនិយោគ​ឈ្មោះ អែមផាយ ប៊ីក ខាភីថល (Empire Big Capital Limited) ហៅ​កាត់​ថា ក្រុមហ៊ុន អ៊ី.ប៊ី.ស៊ី (EBC)។ ក្រៅ​ពី​នេះ ពាក្យ​បណ្ដឹង​ដែល​ជន​រងគ្រោះ​បាន​ដាក់​ទៅ​តុលាការ​ផ្សេង​ទៀត។ លោក​ចាត់​ទុក​បណ្ដាញ​ឆបោក​ទាំងនេះ ថា​អាច​នាំ​ឲ្យ​មាន​ហានិភ័យ​សង្គម និង​សេដ្ឋកិច្ច«ព្រឹកមិញ​ឮ​ពូ​គាត់​មាន​ប្រសាសន៍​ថា តាម​ដែល​គាត់​តួលេខ ខ្ទង់ ៥​ម៉ឺន​នាក់​ដែល​ចាញ់​បោក។ បណ្ដាញ​គាត់​ដឹង យើង​អត់​ដឹង​ទេ។ អ៊ីចឹង​សួរ​ថា ទំហំ​ហ្នឹង​គុណ​នឹង​ប៉ុណ្ណឹង តើ​ប៉ុន្មាន? អ៊ីចឹង​ហើយ​បាន​ជា​ក្រុម​ការងារ​យើង​ដឹង​ភ្លាម យើង​ធ្វើ​មុខ​សញ្ញា​ភ្លាម យើង​គិត​ថា​ប្រហែល​ជា​ក្រុម​នេះ​មាន​បំណង​ធ្វើ​វិច្ឆេទកម្ម ធ្វើ​ឲ្យ​មាន​ហានិភ័យ​សង្គម​ផង ដែល​ប្រជាពលរដ្ឋ​ដូច​លោក​ពូ​ព្រឹកមិញ គាត់​ដាក់​តែ ១​ពាន់ គាត់​ឃើញ​បាន​លុយ​មក គាត់​ថែម ២​ពាន់​ទៀត ឃើញ​បាន​លុយ​មក គាត់​លក់​ដី​ម្ដុំ​បាន​ដល់​ទៅ​មួយ​ម៉ឺន។ ថែម​លុយ​មក​ទៀត គាត់​លក់​ផ្ទះ​ទៀត​ដល់​ទៅ ១៥​ម៉ឺន​ជាង។ អ៊ីចឹង​អត់​ដឹង​ថា​លុយ​នោះ​នៅ​ឯណា? អ៊ីចឹង​បាន​ជា​យើង​គិត​ថា ចំនួន​នេះ ហើយ​រាប់​ទៅ វា​ទៅ​ជា​វិទ្ធង្សនា​សង្គម វា​អាច​ក្លាយ​ទៅ​ជា​វិទ្ធង្សនា​សេដ្ឋកិច្ច»

ពលរដ្ឋ​មក​ពី​ភាគ​ខាង​លិច​ខេត្ត​បាត់ដំបង មួយ​រូប គឺ​លោកស្រី កែវ សុផា មាន​ប្រសាសន៍​ថា លោកស្រី​បាន​ខាតបង់​អស់​ប្រាក់​ចំនួន ៣​ពាន់​ដុល្លារ​ចាប់​តាំង​ពី​ឆ្នាំ​២០១៥។ លោកស្រី​បាន​ទទួល​ការប្រាក់​ពី​ការ​ដាក់​ប្រាក់​ចូល​ហ៊ុន​វិនិយោគ​នោះ​តែ​ពីរ​ខែ​ដំបូង​ប៉ុណ្ណោះ«គេ​ថា​ដាក់​វិនិយោគទុន​ហ្នឹង គេ​ឲ្យ ១​ខែ ១០០ (ដុល្លារ) ក្នុង ១​ពាន់។ ដល់​ហើយ​ខ្ញុំ​អត់​បាន​រហូត​ទាល់​តែ​ឥឡូវ។ ខ្ញុំ​ទិញ​អស់ ៣​ពាន់ (ដុល្លារ) តាំង​ពី ២០១៥ ខែ​៥ ថ្ងៃ​ទី​១០»

ទាក់ទង​នឹង​ក្រុមហ៊ុន​ឆបោក​ទាំងនេះ ត្រូវ​បាន​អគ្គនាយក​គណៈកម្មការ​មូលប័ត្រ​កម្ពុជា និង​រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ អ្នកស្រី ងួន សុខា បញ្ជាក់​ថា មិន​មាន​អាជ្ញាប័ណ្ណ​អនុញ្ញាត​ឲ្យ​ធ្វើ​អាជីវកម្ម​ទេ ហើយ​ការ​ឆបោក​ទាំងនេះ​មាន​ទាំង​នៅ​កម្ពុជា និង​ក្រៅ​ប្រទេស។

រដ្ឋលេខាធិការ​ក្រសួង​យុត្តិធម៌ លោក កើត រិទ្ធ មាន​ប្រសាសន៍​ថា លោក​បាន​ជម្រាប​ទៅ​ពលរដ្ឋ​ដែល​ជា​អ្នក​ចាញ់​បោក​ថា ខាង​លោក​នឹង​យក​បញ្ហា​នេះ​សម្រាប់​ដោះស្រាយ​ជា​អាទិភាព​តាម​សមត្ថកិច្ច​ស្ថាប័ន​នីមួយៗ«ក្រសួង​យុត្តិធម៌ គឺ​នឹង​ស្នើសុំ​ជំរុញ​ការ​អនុវត្ត​ច្បាប់​ឲ្យ​បាន​ម៉ឺងម៉ាត់​ចំពោះ​អ្នក​ប្រព្រឹត្តិ​អំពើ​ឆបោក ហើយ​សុំ​ឲ្យ​តុលាការ​ចាត់​នីតិវិធី​ឲ្យ​បាន​ឆាប់​បំផុត​ស្រប​តាម​ច្បាប់ និង​នីតិវិធី​ជា​ធរមាន»

លោក​បន្ត​ថា ទោះ​ជា​ដឹង​ថា​ខ្លួន​ចាញ់​បោក​គេ​ក្ដី ក៏​ពលរដ្ឋ​ខ្លះ​មិន​សម្រេច​ចិត្ត​ប្ដឹង​ទេ ព្រោះ​ត្រូវ​គេ​ប្រាប់​ថា បើ​ហ៊ាន​ប្ដឹង ពួក​គាត់​នឹង​មិន​បាន​លុយ​នោះ​មក​វិញ​ទេ។ ពួក​គាត់​ខ្លះ​ត្រូវ​ចាញ់​បោក​ជា​លើក​ទី​ពីរ។ លោក​ថា ដោយសារ​នៅ​ពេល​នេះ​មាន​ពលរដ្ឋ​ប្ដឹង​ទៅ​កន្លែង​ផ្សេងៗ​គ្នា​ច្រើន​តំបន់ ខាង​គណៈមេធាវី​បាន​ផ្ដល់​មេធាវី ២​រូប​សម្រាប់​ជួយ​សម្របសម្រួល​ពាក្យ​បណ្ដឹង​របស់​ពួក​គាត់ ដោយ​មិន​គិត​ថ្លៃ​សេវា។

លោក ងី ច័ន្ទ្រផល បញ្ជាក់​ថា អ្នក​ចាញ់​បោក​បណ្ដាញ​ប្រមូល​ចូល​ហ៊ុន​ទាំងនោះ​មាន​ចាប់​ពី​ពលរដ្ឋ​នៅ​តាម​ជនបទ តាម​បណ្ដា​ខេត្ត រហូត​ដល់​មន្ត្រី​នៅ​ក្រសួង​មហាផ្ទៃ។ បច្ចុប្បន្ន មាន​ពលរដ្ឋ ៦​ខេត្ត​បាន​ដាក់​ពាក្យ​បណ្ដឹង​ហើយ រីឯ ៥​ខេត្ត​ទៀត​នឹង​ប្ដឹង​បន្ត។ លោក​ក្រើន​រំឭក​ដល់​ពលរដ្ឋ​ឲ្យ​ប្រុង​ប្រយ័ត្ន​ចំពោះ​ការ​ឆបោក​បន្ត​ទៀត តាម​បែប​ប្រមូល​លុយ​យក​ទៅ​រាប់​ឲ្យ​អ្នក​ខ្ចី​បង់​រំលស់​ប្រចាំ​ថ្ងៃ និង​ការ​ប្រមូល​លុយ​យក​ទៅ​ចូល​ហ៊ុន​លើ​គម្រោង​អភិវឌ្ឍន៍​ដែល​បាន​ការប្រាក់​ខ្ពស់។ លោក​អ្នក​អាច​សួរ​ព័ត៌មាន​តាម​ទូរស័ព្ទ​លេខ ០៣១ ៦០ ១២៣៤៥ និង​លេខ ០៣១ ២០ ១២៣៤៥ ក្នុង​ករណី​សង្ស័យ​អំពី​ការ​ឆបោក៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល