ពលរដ្ឋ​​ផ្ទុក​មេរោគ​អេដស៍​នៅ​បាត់ដំបង​កើន​ដល់​២០៣​នាក់

ដោយ ហ៊ុំ ចំរើន
2014-12-30
អ៊ីម៉ែល
មតិ
Share
បោះពុម្ព
សកម្មភាព​ប្រជាពលរដ្ឋ​ទៅ​ធ្វើតេស្ត​ឈាម​រក​មេរោគ​អេដស៍​នៅ​មណ្ឌល​សុខភាព​រកា ស្រុក​សង្កែ ខេត្ត​បាត់ដំបង នៅ​ថ្ងៃ​ទី​៣០ ធ្នូ ២០១៤។
សកម្មភាព​ប្រជាពលរដ្ឋ​ទៅ​ធ្វើតេស្ត​ឈាម​រក​មេរោគ​អេដស៍​នៅ​មណ្ឌល​សុខភាព​រកា ស្រុក​សង្កែ ខេត្ត​បាត់ដំបង នៅ​ថ្ងៃ​ទី​៣០ ធ្នូ ២០១៤។
RFA/Hum Chamroeun

ពលរដ្ឋ​​ផ្ទុក​មេរោគ​អេដស៍​នៅ​ភូមិ​រកា ស្រុក​សង្កែ ខេត្ត​បាត់ដំបង កើន​ឡើង​ដល់​ចំនួន ​២០៣​នាក់​ហើយ គិត​ត្រឹម​ថ្ងៃ​ទី​២៩ ធ្នូ។ ពួកគាត់​ទាំង​នោះ​អំពាវនាវ​ឲ្យ​រដ្ឋាភិបាល​ និង​មន្ត្រី​ពាក់​ព័ន្ធ​ផ្ដល់​ជំនួយ​ឧបត្ថម្ភ​ជា​ថវិកា ឬ​ស្បៀង​អាហារ​ហូប​ចុក​ដើម្បី​យក​ទៅ​ដោះស្រាយ​ជីវភាព​រស់​នៅ​​​ប្រចាំ​ថ្ងៃ។

អ្នក​ភូមិ​ដែល​ផ្ទុក​មេរោគ​អេដស៍​នៅ​ស្រុក​សង្កែ​ ឲ្យ​ដឹង​ថា​ រហូត​មក​ទល់​ពេល​នេះ​​មាន​ស្ថាប័ន​រដ្ឋ​សភា និង​មន្ត្រី​ពាក់​ព័ន្ធ​ផ្ដល់​ជំនួយ​ខ្លះ​ដែរ​ដល់​ពួកគាត់​​ រួម​មាន​ថវិកា​ប្រមាណ ១០​ម៉ឺន​រៀល​ អង្ករ ៥០​គីឡូក្រាម​ និង​របស់​របរ​មួយ​ចំនួន​ទៀត​ ដែល​គិត​ជា​ទឹក​ប្រាក់​សរុប​ប្រមាណ ៧០​​​ដុល្លារ​អាមេរិក​ ក្នុង​ម្នាក់។

ក្រុម​ប្រជាពលរដ្ឋ​ដែល​ផ្ទុក​មេរោគ​អេដស៍​នៅ​ភូមិ​រកា ឃុំ​រកា ស្រុក​សង្កែ ខេត្ត​បាត់ដំបង ថ្លែង​នៅ​ថ្ងៃ​ទី​៣០ ធ្នូ ថា បន្ទាប់​ពី​ធ្វើតេស្ត​ឈាម​ដឹង​ថា មាន​មេរោគ​អេដស៍​មក​ គឺ​ពួកគាត់​ដែល​ជា​កសិករ​ក្រីក្រ​ផង​នោះ​ ម្នាក់ៗ​ខ្វល់​ខ្វាយ​ពី​ជំងឺ​នេះ​មិន​ឈប់​ឈរ​ ហើយ​​ពុំ​បាន​​ចេញ​ទៅ​ស្វែង​រក​ការងារ​ធ្វើ​ឆ្ងាយ​ពី​ផ្ទះ​សម្បែង​របស់​ ខ្លួន​​នោះ​ទេ។ អ្នក​ភូមិ​​បញ្ជាក់​ថា​ ជំនួយ​ដែល​ស្ថាប័ន​ពាក់​ព័ន្ធ​ឧបត្ថម្ភក​ដល់​ពួកគាត់​នោះ​ដោះ​ស្រាយ​បាន​តែ​ ​ក្នុង​រយៈ​ពេល​ខ្លី​ប៉ុណ្ណោះ​ ចំពោះ​រយៈ​ពេល​វែង​ខាង​មុខ​ទៀត​មិន​ដឹង​ទៅ​ជា​យ៉ាង​នោះ​ទេ៖ «ខ្វល់ខ្វាយ​ដូច​វា​មិន​សមហេតុសមផល។ ធ្លាប់​តែ​ចង់​ទៅ​ណា​បាន​តាម​ចិត្ត តែ​ដល់​ពេល​កើត​ជំងឺ​អ៊ីចឹង​ទៅ​គឺ​ទៅ​ណា​មិន​រួច​ទេ។ ខ្ញុំ​ដល់​ពេល​ឈឺ​អ៊ីចឹង​កូន​មក​នៅ​ជុំ​គ្នា​ ហើយ​គ្មាន​នរណា​ទៅ​រក​ស៊ី​ចិញ្ចឹម​ទេ បើ​ចង់​ទៅ​ណា​ឆ្ងាយ​ក៏​ទៅ​មិន​រួច​វិលៗ គឺ​រង់ចាំ​តែ​​ខែ​បើក​ថ្នាំ​​រាល់​ខែ​ទៅ។ សូម​ឲ្យ​រដ្ឋាភិបាល​ជួយ​ផ្ដល់​ជំនួយ​បន្ថែម​ទៀត​ជា​រៀង​រាល់​ខែ​មក​ ដើម្បី​ជួយ​ដល់​ពួក​ខ្ញុំ​អ្នក​កើត​ជំងឺ​អេដស៍​ផង​យក​ទៅ​ដោះស្រាយ​ប្រចាំ​ថ្ងៃ»

ទាក់​ទង​នឹង​បញ្ហា​នេះ ​ប្រធាន​គណៈកម្មការ​ទី​៨ នៃ​រដ្ឋ​សភា អ្នកស្រី កែ សុវណ្ណរតន៍ ធ្លាប់​មាន​ប្រសាសន៍​ ខណៈ​ចុះ​​ចែក​អំណោយ​និង​ផ្ដល់​កម្លាំង​ចិត្ត​ដល់​ប្រជាពលរដ្ឋ​ដែល​ផ្ទុក​ មេរោគ​អេដស៍​នៅ​ភូមិ​ការ កាល​ពី​ថ្ងៃ​២៧ ធ្នូ ថា អ្នកស្រី​នឹង​ជំរុញ​ឲ្យ​រដ្ឋាភិបាល​ស្វែង​រក​កញ្ចប់​ថវិកា​ផ្គត់ផ្គង់​ដល់​ អ្នក​ផ្ទុក​មេរោគ​អេដស៍​ដើម្បី​ដោះស្រាយ​ជីវភាព​ប្រចាំ​ថ្ងៃ​បន្ត​ទៀត៖ «ព្រោះ​ពួកគាត់​ត្រូវ​ការ​លើក​ទឹក​ចិត្ត​ខ្លាំង​ ដើម្បី​ជួយ​ដល់​ជីវភាព​រស់​នៅ​របស់​ពួកគាត់​ ព្រោះ​ថា សមាជិក​​​ក្រុម​គ្រួសារ​របស់​គាត់​មិន​អាច​ធ្វើ​អ្វី​បាន​ច្រើន​ដូច​ពេល​មុន​នោះ​ទេ។ អ៊ីចឹង​រឿង​នេះ​យើង​ត្រូវ​តែ​រក​មូលនិធិ​ជួយ​ដល់​ពួកគាត់»

រហូត​មក​ដល់​ពេល​នេះ​ យើង​សង្កេត​ឃើញ​មាន​អង្គការ​ព្រះពុទ្ធសាសនា​ដើម្បី​អភិវឌ្ឍន៍​ ចុះ​អប់រំ​ផ្នែក​ផ្លូវ​ចិត្ត​ដល់​ប្រជាពលរដ្ឋ​ដែល​មាន​មេរោគ​អេដស៍​នៅ​តាម​ ផ្ទះ​ជា​បន្តបន្ទាប់​​ដែរ។

មន្ត្រី​ស្ម័គ្រ​ចិត្ត​អង្គការ​ព្រះពុទ្ធសាសនា​ដើម្បី​អភិវឌ្ឍន៍ លោក​ ពេក​ ញ៉ាញ មាន​ប្រសាសន៍​ខណៈ​ចុះ​អប់រំ​តាម​ផ្ទះ​អ្នក​ភូមិ​ថា ការ​ចុះ​អប់រំ​ផ្លូវ​ចិត្ត​ប្រជាពលរដ្ឋ​នេះ​ ដើម្បី​ផ្ដល់​កម្លាំង​ចិត្ត​ដល់​អ្នក​​ដែល​ផ្ទុក​មេរោគ​អេដស៍​កុំ​ឲ្យ​ ពួកគាត់​គិត​រវើរវាយ​ពី​​ជំងឺ​ដែល​ជួប​ប្រទះ៖ «ដូច​អ្នក​ខ្លះ​គាត់​នៅ​ក្មេង នៅ​ពេល​ដែល​យើង​សួរ​គាត់​ទៅ​រហូត​គាត់​ទ្រាំ​មិន​បាន​ក៏​យំ។ ដល់​អ៊ីចឹង​ទៅ​យើង​ពន្យល់​ប្រាប់​គាត់​ពី​មូល​ហេតុ​ដែល​ឆ្លង​ជំងឺ​ហ្នឹង​ថា មិន​មែន​កើត​ឡើង​ដោយសារ​ការ​រួម​ភេទ​នោះ​ទេ​ គឺ​បញ្ហា​ផ្សេងៗ​ទៀត​ក៏​អាច​ឆ្លង​ជំងឺ​អេដស៍​បាន​ដែរ»

​​​​​​​​​​​​​​​​​​​​​​​​​​​​​​​​​​​​​​​ជំទប់​ទី​២​ឃុំ​រកា​ លោក​ សឿម ឆម​ ឲ្យ​ដឹង​ថា លទ្ធផល​ប្រជាពលរដ្ឋ​នៅ​ភូមិ​រកា ឃុំ​រកា ​ដែល​ទៅ​ធ្វើ​តេស្តឈាម​ ហើយ​មាន​មេរោគ​អេដស៍​កើន​ឡើង​​ដល់​​ចំនួន ២០៣​នាក់​​ហើយ​ គិត​ត្រឹម​ថ្ងៃ​ទី​២៩ ធ្នូ នោះ។ យ៉ាង​ណា​ក៏​ដោយ​លោក​គិត​ថា ចំនួន​នេះ​អាច​នឹង​កើន​ឡើង​ទៀត​ ដោយសារ​ប្រជាពលរដ្ឋ​នៅ​តែ​នាំ​គ្នា​ទៅ​ធ្វើតេស្ត​ឈាម​ជា​បន្ត​បន្ទាប់​នៅ​ ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

ចិត្តស្មោះ

សូមអោយរាជ្យរដ្ឋាភិបានរៀនទទួលខុសត្រូវ
សូមកុំនិយាយថាវាខុសបច្ចេកទេសទៀត

Dec 31, 2014 12:55 AM

អ្នក​អាន​អនាមិក

YOU KNOW AIDS VIRUS ARE NOT EASILY CONTAGIOUS.USING CLEAN SYRINGE FOR MULTIPLE PERSONS WON'T CREATE AIDS.SO THERE MUST BE SOMEONE SMUGGLES THE VIRUS INTO THE VILLAGE.MAY BE YOURN AGENTS WANT KHMER TO DIE ?!? MOSQUITO CANNOT TRANSMIT THE DISEASE-IF MOSQUITO ABLE TO TRANSMIT ,"ALL PEOPLE" IN PHNOM PENH HAVE AIDS.

Dec 30, 2014 09:04 AM

អ្នក​អាន​អនាមិក

request for expertise to study deeply about this case. what is the root cause? if it is from mosquito bite?

Dec 30, 2014 05:15 AM

គេហទំព័រ​ទាំងមូល