ទស្សនៈ​យុវជន​ជុំវិញ​ការ​ឃុំ​ខ្លួន​លោក កឹម សុខា ​រយៈ​ពេល ២ឆ្នាំ

ដោយ ហេង រស្មី
2019-09-02
អ៊ីម៉ែល
មតិ
Share
បោះពុម្ព
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
Photo courtesy of Kem Sokha's Facebook Page

យុវជន​មួយ​ចំនួន​យល់​ថា ការ​ឃុំ​ខ្លួន លោក កឹម សុខា ប្រធាន​គណបក្ស​សង្គ្រោះ​ជាតិ ២​ឆ្នាំ​មក​នេះ បាន​ធ្វើ​ឲ្យ​ស្ថានការណ៍​នយោបាយ ​ច្បាប់​ សិទ្ធិ​សេរីភាព នៅ​កម្ពុជា មាន​ភាព​អាក្រក់​ខ្លាំង។ ជាង​នេះ​ទៅ​ទៀត ពួក​គេ​យល់​ថា លទ្ធិ​ប្រជាធិបតេយ្យ​ក៏​រង​ការ​បំផ្លាញ​​ខ្ទេចខ្ទី​ដែរ។ ពួកគេ​ទាមទារ​ឲ្យ​របប​ក្រុង​ភ្នំពេញ ដោះ​លែង​​លោក កឹម សុខា​ វិញ​ នៅ​ក្នុង​ខួប ២ឆ្នាំ​ នៃ​ការ​ឃុំ​ខ្លួន​​លោក កឹម សុខា នេះ។

យុវជន​ម្នាក់​រស់​នៅ​ខេត្ត​កំពង់ធំ ​លោក ឆាយ ចែង យល់​ថា​ ២ឆ្នាំ​មក​នេះ រដ្ឋាភិបាល​មិន​ត្រឹម​តែ​ឃុំ​ខ្លួន លោក កឹម សុខា​ ទេ ប៉ុន្តែ​បាន​​ធ្វើ​ទុក្ខ​បុក​ម្នេញ​មន្ត្រី​បក្ស​ប្រឆាំង​តាម​មូលដ្ឋាន​ទៀត​ផង។ លោក​ថា ​ការ​​ឃុំ​ខ្លួន​លោក កឹម សុខា ធ្វើ​ឲ្យ​ច្បាប់ និង​នយោបាយ អាក្រក់​មិន​ធ្លាប់​មាន​​ តាំង​ពី​ការ​បោះឆ្នោត​ឆ្នាំ​១៩៩៣​មក។ លោ ​រំលឹក​ថា កាល​មិន​ទាន់​ជាប់​ឃុំ លោក កឹម សុខា ចូល​ចិត្ត​ចុះ​តាម​មូលដ្ឋាន​​ពន្យល់​លទ្ធិ​ប្រជាធិបតេយ្យ​ឲ្យ​ពលរដ្ឋ​ស្ដាប់។ តែ​ ២​ឆ្នាំ​នៃ​ការ​ឃុំ​ខ្លួន​លោក កឹម សុខា​ ធ្វើ​ឲ្យ​ពលរដ្ឋ​លែង​​បាន​​ជ្រួត​ជ្រាប​អំពីលទ្ធិ​ប្រជាធិបតេយ្យ​ទៀត​ហើយ៖ «គឺ​អាក្រក់​មែន​ទែន ចំពោះ​ភាព​ចង់​​ដឹង​ពី​ប្រជាធិបតេយ្យ​នៅ​ក្នុង​រយៈ​ពេល​ចុង​ក្រោយ​នេះ ដោយសារ​តែ​មេ​បក្ស​ ដែល​យល់​ដឹង​ពី​លទ្ធិ​ប្រជាធិបតេយ្យ​ច្រើន​ គាត់​មិន​បាន​ផ្សព្វផ្សាយ​គោល​នយោបាយ​របស់​បក្ស។ មិន​បាន​រំលឹក​ពី​​ប្រជាធិបតេយ្យ​ ដែល​ពលរដ្ឋ​គួរ​តែ​ធ្វើ គួរ​តែ​ប្រតិបត្តិ។ ប្រជា​ពលរដ្ឋ​ មិន​បាន​ដឹង​ទេ ពេល​ដែល​គេ​ចាប់​លោក កឹម សុខា រយៈ​ពេល ​២​ឆ្នាំ​មក​នេះ»។​

យុវជន​ម្នាក់​ទៀត​ រស់​នៅ​រាជធានី​ភ្នំពេញ លោក វ៉ន ចាន់ឡូត ហៅ​ការ​ឃុំ​ខ្លួន លោក កឹម សុខា រយៈ​ពេល​២​ឆ្នាំ​មក​នេះ​ ជា​អំពើ​អយុត្តិធម៌​សម្រាប់​លោក កឹម សុខា និង​អ្នក​គាំទ្រ​គណបក្ស​សង្គ្រោះ​ជាតិ។ អ្នក​​តាម​ដាន​នយោបាយ​រូប​នេះ សង្កេត​ឃើញ​ថា តុលាការ​មិន​ទាន់​រក​ឃើញ​កំហុស​ ឬ​ទោស​របស់ លោក កឹម សុខា ទេ ២​ឆ្នាំ​​មក​នេះ ក៏​ប៉ុន្តែ​តុលាការ​បាន​សម្រេច​រំលាយ​គណបក្ស​ប្រឆាំង ក៏​ជា​ហេតុ​ធ្វើ​ឲ្យ​មាន​ភាព​អយុត្តិធម៌​សម្រាប់​អ្នក​គាំទ្រ​បក្ស​ប្រឆាំង​​ប្រហែល​កន្លះ​ប្រទេស៖ «(តាំង​ពី)​ ការ​ចាប់​មេ​ដឹក​នាំ​អតីត​មេ​បក្ស​ប្រឆាំង​មក យើង​ឃើញ​ស្ថានភាព​នយោបាយ​របស់​ប្រទេស​កម្ពុជា មាន​សភាព​ធ្លាក់​ចុះ​ដល់​កំពូល។ យើង​ឃើញ​ស្ថានភាព​សិទ្ធិ​មនុស្ស​ វា​កាន់​តែ​មាន​ការ​មិន​ល្អ​ប្រសើរ​ទេ សម្រាប់​ជាតិ​ ជា​ពិសេស​ក្នុង​ផ្នែក​នយោបាយ​​ហ្នឹង ហើយ​សកម្មជន​នៃ​អតីត​គណបក្ស​ប្រឆាំង​មួយ​ចំនួន​ត្រូវ​បាន​គំរាម​កំហែង ក៏​ដូចជា​ចាប់​ខ្លួន​បន្ត​បន្ទាប់​​អ៊ីចឹង​បាន បើ​ទោះ​បី មាន​ការ​ជួបជុំ​ ត្រូវ​បាន​អនុញ្ញាត​ដោយ​ច្បាប់​ក៏​ដោយ ឬ​ក៏​បាតុកម្ម​ ដោយ​ការ​ការ​ពារ​ដោយ​ច្បាប់​ក៏​ដោយ»​​

យុវជន​ម្នាក់​ទៀត លោក ខាន់ ភូមិន្ទ និយាយ​ថា កំឡុង​ពេល​ឃុំ​ខ្លួន លោក កឹម សុខា​ ២​ឆ្នាំ​នេះ ហាក់​ធ្វើ​ឲ្យ​យុវជន​ខ្លាច​រអា​ក្នុង​ការ​ចូលរួម​សកម្មភាព​នយោបាយ។ លោក​ ថា ​ក្នុង​អំឡុង​២​ឆ្នាំ​នេះ ទោះ​គណបក្ស​នយោបាយ​ចូល​រួមការ​​បោះឆ្នោត​ច្រើន​ជាង​មុន​មែន តែ​មិន​សូវ​មាន​យុវជន​គាំទ្រ​ឡើយ។ លោក​កត់​សម្គាល់​ទៀត​ថា យុវជន​ដែល​ចូលចិត្ត​ប្រលូក​នយោបាយ​ក៏​ថយ​ចុះ ការ​វែក​ញែក​នយោបាយ​ជា​ចំហ​ក៏​រង​ការ​រឹតត្បិត និង​ឃ្លាំមើល។ លោក​ចង់​ឃើញ​ មាន​ការ​ដោះលែង​ លោក កឹម សុខា ហើយ​គណ​បក្ស​កាន់​អំណាច និង​បក្ស​ប្រឆាំង ចរចា​គ្នា​វិញ ​ទើប​អាច​ស្ដារ​ស្ថានការណ៍​នយោបាយ​បាន៖ «រូប​ភាព​ជាក់ស្ដែង បើ​ទោះ​ខ្ញុំ​មិន​និយាយ​ក៏​បងប្អូន​ប្រជាពលរដ្ឋ​គាត់​ឃើញ​ស្រាប់​ដែរ ការ​ធ្លាក់​ចុះ​វា​មាន​ហើយ ពីព្រោះ​នៅ​ពេល​ដែល​គណបក្ស​ប្រឆាំង​​ធំ​ ត្រូវ​បាន​បិទ​បញ្ចប់​ទៅ​ យើង​ឃើញ​​ថា ភាព​ក្លៀវក្លា​របស់​យុវជន​ទៅ​លើ​លទ្ធិ​ប្រជាធិបតេយ្យ​ត្រូវ​ធ្លាក់​ចុះ ទាំង​នៅ​ក្នុង​សកម្មភាព​សង្គម និង​សកម្មភាព​ផ្សេងៗ»។

សមត្ថកិច្ច​របប​ក្រុង​ភ្នំពេញ បាន​ឆ្មក់​ចូល​ចាប់​ខ្លួន​ លោក កឹម សុខា នៅ​យប់​រំលង​អាធ្រាត្រ​ ឈាន​ចូល​ថ្ងៃ​ទី៣ កញ្ញា ឆ្នាំ២០១៧ និង​ដឹក​យក​ទៅ​ឃុំ​ខ្លួន​ទាំង​យប់ នៅ​ពន្ធនាគារ​ត្រពាំង​ផ្លុង នៅ​ខេត្ត​ត្បូង​ឃ្មុំ ក្បែរ​ព្រំដែន​ប្រទេស​វៀតណាម។ ប៉ុន្មាន​ថ្ងៃ​ ក្រោយ​ការ​ចាប់​ខ្លួន លោក កឹម សុខា លោក ហ៊ុន សែន និង​មន្ត្រី​ជាន់​ខ្ពស់​ក្នុង​របប​ក្រុង​ភ្នំពេញ បាន​ព្រមាន​ហាម ​ពលរដ្ឋ​មិន​ឲ្យ​ចេញ​ធ្វើ​បាតុកម្ម​គ្រប់​ទម្រង់។ ពលរដ្ឋ​ថា រយៈ​ពេល ២ឆ្នាំ​មក​នេះ របប​លោក ហ៊ុន សែន រឹត​ត្បិត​ពួក​គាត់ មិន​ឲ្យ​បាន​ចេញ​ធ្វើ​បាតុកម្ម​ម្ដង​ណា​សោះ។

ពលរដ្ឋ​ម្នាក់​រស់​នៅ​ខណ្ឌ​ដង្កោ រាជធានី​ភ្នំពេញ លោក តារា វិច្ឆ័យ យល់​ថា រដ្ឋាភិបាល​មិន​ត្រឹម​ឃុំ​ខ្លួន លោក ​កឹម សុខា ទេ តែ​បាន​ឃុំ​សិទ្ធិ​សេរីភាព​ពលរដ្ឋ​ មិន​ឲ្យ​ចេញ​តវ៉ា​ថែម​ទៀត។ លោក​ថា ពលរដ្ឋ​​បាន​បង្ខំ​ចិត្ត​ ធ្វើ​គ ធ្វើ​ថ្លង់ ដើម្បី​រក្សា​សុខ ក្នុង​ពេល ​២​ឆ្នាំ​នេះ។ យុវជន​រូប​នេះ​ថា កាន់​តែ​អាក្រក់​ជាង​នេះ​ទៅ​ទៀត គឺ​រដ្ឋាភិបាល​បាន​ធ្វើ​ទុក្ខ​បុក​ម្នេញ​មន្ត្រី​​គណបក្ស​ប្រឆាំង​នៅ​ថ្នាក់​ក្រោម ឲ្យ​លែង​ហ៊ាន​និយាយ​ស្ដី តវ៉ា​អ្វី​ទាំង​អស់ បើ​ពុំ​ដូច្នោះ​ទេ ហើយ​បើ​មាន​ការ​តវ៉ា នឹង​ត្រូវ​រង​ការ​ចាប់​ខ្លួន ដូច​មនុស្ស​ជាង ១០នាក់ ដែល​ត្រូវ​របប​ក្រុង​ភ្នំពេញ​បង្ក្រាប​កន្លង​មក៖ «បើ​និយាយ​ពី​រឿង​ការ​ចាប់​ខ្លួន មេ​បក្ស​ប្រឆាំង លោក​ កឹម សុខា រយៈ​ពេល​២​ឆ្នាំ​មក​នេះ ស្ថានភាព​នយោបាយ​នៅ​ស្រុក​ខ្មែរ​យើង​នេះ តាំង​ពី​សេដ្ឋកិច្ច តាំង​ពី​នយោបាយ​គឺ​តឹង​តែ​ម្ដង​ហ្មង សព្វ​ថ្ងៃ​ហ្នឹង។ បើ​ប្រៀបធៀប​វិញ គឺ​អាក្រក់​បំផុត​ហើយ ក្នុង​ប្រទេស​ប្រជាធិបតេយ្យ​ គេ​មិន​ដែល​បំបិទ​សិទ្ធិ​សេរីភាព​អ៊ីចឹង ហើយ​ចេះ​តែ ​អួត​ទៅ​ប្រាប់​អន្តរជាតិ ថា ប្រទេស​ឯង​មាន​ប្រជាធិបតេយ្យ​ពេញ​លេញ គ្មាន​ទាល់​តែ​សោះ​ម្ដង ភរ​ទាំង​ស្រុង។ បើ​និយាយ​ថា អាក្រក់​ហ្នឹង វា​អាក្រក់​ហ្មង រក​លេខ​គ្មាន​ទេ»។​​

ប្រធាន​ក្រុម​អ្នក​វិភាគ​វ័យ​ក្មេង កញ្ញា លី ស្រីស្រស់ សង្កេត​ឃើញ​ថា ការ​​ឃុំ​ខ្លួន​លោក កឹម សុខា គ្មាន​បាន​ផ្ដល់​ផល​ចំណេញ​ដល់​រដ្ឋាភិបាល និង​ប្រទេស​កម្ពុជា​ទេ តែ​ផ្ទុយ​ទៅ​វិញ ​២​ឆ្នាំ​មក​នេះ កេរ្តិ៍​ឈ្មោះ​រដ្ឋាភិបាល កាន់​តែ​អាក្រក់​នៅ​ឆាក​អន្តរ​ជាតិ ខណៈ​ក្រុម​ប្រទេស​លោក​សេរី ចេញ​មុខ​ថ្កោល​ទោស​ជា​បន្ត​បន្ទាប់។ កញ្ញា​បន្ត​ថា ការ​ឃុំ​ខ្លួន លោក កឹម សុខា ២ឆ្នាំ​នេះ បាន​ធ្វើ​ពលរដ្ឋ​សម្លឹង​​មើល​ថា រដ្ឋាភិបាល​ជា​តួ​ចិត្ត​អាក្រក់ ចំណែក​ស្ថានភាព​នយោបាយ​វិញ កាន់​តែ​ចាក់​ស្រេះ សេដ្ឋកិច្ច​ពលរដ្ឋ មាន​តែ​ការ​អន់​ថយ។

កញ្ញា លី ស្រីស្រស់ ថា ការ​បន្ត​ឃុំ​ខ្លួន​មេ​បក្ស​ប្រឆាំង គ្មាន​ផ្ដល់​ភាព​ចំណេញ​ដល់​គណបក្ស​កាន់​អំណាច​ទេ បើ​ទោះ​បក្ស​កាន់​អំណាច​អាច​នឹង​គិត​ថា ដើម្បី​បំបែក​បំបាក់​ ឬ​បង្ការ​គម្រោង​ប្រមូល​កម្លាំង​​ចេញ​តវ៉ា​ក៏​ដោយ៖ «ខ្ញុំ​គិត​ថា ការ​ចាប់​ខ្លួន​នេះ វា​កាន់​តែ​ធ្វើ​ឲ្យ​ពលរដ្ឋ​ ​នៅ​ក្នុង​ប្រទេស​នេះ កាន់​តែ​មាន​ភាព​​ ​​ទុទិដ្ឋិនិយម​ខ្លាំង​ ចំពោះ​រដ្ឋាភិបាល​វិញ។ មាន​ន័យ​ថា មើល​រដ្ឋាភិបាល​នៅ​ក្នុង​ផ្លូវ​អវិជ្ជមាន​ច្រើន។ អ៊ីចឹង​អា​ចំណុច​នេះ សំខាន់​ជាង​ចំណុច​ផ្សេង ដោយសារ​តែ​ប្រទេស​មួយ រដ្ឋាភិបាល​មួយ​ដើរ​បាន​ វា​ទាល់​តែ​មាន​ប្រជាជន​គាំទ្រ បើ​ធ្វើ​បែប​នេះ វា​ធ្វើ​ឲ្យ​ប្រជាពលរដ្ឋ​បាត់​បង់​ជំនឿ​ជាក់ និង​អាច​មិន​គាំទ្រ​រដ្ឋាភិបាល ហើយ​ពិសេស​គណបក្ស​ប្រជាជន​កម្ពុជា។ អ៊ីចឹង គណបក្ស​ប្រជាជន​កម្ពុជា ក្លាយ​ជា​តួអង្គ​អាក្រក់​នៅ​ក្នុង​ភ្នែក​ពលរដ្ឋ»។​​​​​

យុវជន​ថា​ រយៈ​ពេល ២ឆ្នាំ នៃ​ការ​ឃុំ​ខ្លួន លោក កឹម សុខា នេះ ពលរដ្ឋ​រស់​នៅ​ប្រទេស​កម្ពុជា គ្មាន​ដែល​បាន​ធ្វើ​បាតុកម្ម​សុំ​ឲ្យ​ដោះ​លែង​​លោក កឹម សុខា បាន​ម្ដង​ឡើយ ព្រោះ​របប​ក្រុង​ភ្នំពេញ​ បិទ​សិទ្ធិ​នេះ​ដាច់​ខាត។ ប៉ុន្តែ​ការ​ធ្វើ​បាតុកម្ម​របស់​ពលរដ្ឋ​ខ្មែរ​នៅ​ក្រៅ​ប្រទេស​វិញ បាន​កើន​ឡើង​ នៅ ​២​ឆ្នាំ​នេះ។ ពលរដ្ឋ និង​ក្រុម​យុវជន​ខ្មែរ តែង​នាំ​ធ្វើ​បាតុកម្ម​ប្រឆាំង​វត្ត​មាន​លោក ហ៊ុន សែន នៅ​ពេល​​លោក​ទៅ​ក្រៅ​ប្រទេស ឬ​ទៅ​ចូល​រួម​កិច្ច​ប្រជុំ​ម្ដងៗ សូម្បី​​​កិច្ច​ប្រជុំ​នៅ​អង្គ​ការ​សហប្រជាជាតិ ក៏​ពលរដ្ឋ​​ នាំ​គ្នា​តាម​ទៅ​ធ្វើ​បាតុកម្ម​ ដល់​​ពី​មុខ​​អង្គការ​សហប្រជាជាតិ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល