ជប៉ុន​ផ្អាក​ជំនួយ​ក្នុង​គម្រោង​សាងសង់​ស្ពាន​អ្នកលឿង?

តំណាង​រាស្រ្ត​គណបក្ស​សមរង្ស៊ី​បាន​ថ្លែង​ឲ្យ​ដឹង​នៅ​ថ្ងៃ​ទី​៣០ ធ្នូ​នេះ ថា ប្រទេស​ជប៉ុន​បាន​ផ្អាក​ជំនួយ​ឥត​សំណង​ចំនួន ៧៤​លាន​ដុលា្លរ​អាមេរិក​ដល់​រដ្ឋាភិបាល​កម្ពុជា​ក្នុង​គម្រោង​សាងសង់​ស្ពាន​អ្នកលឿង។
ដោយ ទីន ហ្សាការីយ៉ា
2009-12-31
អ៊ីម៉ែល
មតិ
Share
បោះពុម្ព

ការ​ប្រកាស​ផ្អាក​នោះ​គឺ​បាន​ធ្វើ​ឡើង​បន្ទាប់​ពី​មាន​ការ​ចោទ​ប្រកាន់​រដ្ឋាភិបាល​កម្ពុជា​ថា មិន​បាន​ផ្តល់​សំណង​សមរម្យ​ដល់​ប្រជាពលរដ្ឋ​ជា​ថ្នូរ​នឹង​ការ​រុះរើ​ផ្ទះ​ចេញ​ដើម្បី​យក​កន្លែង​សាងសង់​ស្ពាន​នោះ។

លោកស្រី លី ស្រីវីណា តំណាង​រាស្រ្ត​គណបក្ស​សមរង្ស៊ី បាន​មាន​ប្រសាសន៍​ថា នៅ​ពេល​ដែល​លោកស្រី​ទៅ​ធ្វើ​ទស្សនកិច្ច​នៅ​ប្រទេស​ជប៉ុន​កាល​ពី​ខែ​មេសា​កន្លង​ទៅ​នេះ ភាគី​ជប៉ុន​បាន​ប្រាប់​លោកស្រី​ថា លុះត្រា​ណា​រដ្ឋាភិបាល​កម្ពុជា​បាន​ផ្តល់​សំណង​សមរម្យ​ដល់​ប្រជាពលដ្ឋ​ដែល​បណ្តេញ​ចេញ​ទើប​ជប៉ុន​នឹង​ផ្តល់​ថវិកា​នោះ។

លោកស្រី លី ស្រីវីណា បាន​បញ្ជាក់​ថា ៖ «ការ​ដែល​ចាប់ផ្ដើម​សាងសង់​មែនទែន​គម្រោង​ហ្នឹង​គឺ​ឲ្យ​ជំនួយ​អត់​ចំណង ប៉ុន្តែ​ដល់​ឆ្នាំ​២០០៨ គាត់​ថា គាត់​ធ្វើ Audit ទៅ​ឃើញ​ថា រដ្ឋាភិបាល​មាន​លទ្ធភាព​គ្រប់គ្រាន់​ហើយ ឲ្យ​ខ្ចី​វិញ អត់​ឲ្យ​អត់​ចំណង​ទេ ដោយសារ​គាត់​ធ្វើ Audit (ពិនិត្យ​បញ្ជី) ទៅ ប្រហែល​ជា​អាច​ឃើញ​មន្ត្រី​រដ្ឋាភិបាល​មាន​លុយ​ច្រើន​ហើយ មាន​លទ្ធភាព​សង់​ខ្លួន​ឯង ឲ្យ​កម្ចី​វិញ តែ​ឥឡូវ​ហ្នឹង​កម្ចី​ហ្នឹង​ក៏​អត់​ទាន់​លេច​ចេញ​ជា​រូបរាង​ដែរ​រឿង​ស្ពាន​អ្នកលឿង​ហ្នឹង ពីព្រោះ​ផ្លូវ​ជាតិ​លេខ​១​មិន​ទាន់​ចប់​ទេ តែ​ផ្លូវ​ជាតិ​លេខ​១ គឺ​យើង​មិន​អាច​និយាយ​ដល់​គម្រោង​ទី​២ ដែល​សង់​ស្ពាន​អ្នកលឿង​ហ្នឹង​ទេ»

ទាក់ទង​នឹង​ការ​លើក​ឡើង​របស់​តំណាង​រាស្ត្រ​គណបក្ស​សមរង្ស៊ី​នេះ លោក ឈាង វុន តំណាង​រាស្រ្ត​គណបក្ស​ប្រជាជន​កម្ពុជា​និង​ជា​ប្រធាន​គណៈកម្មាធិការ​ទទួល​បន្ទុក​ការ​បរទេស បាន​ច្រាល​ចោល​ការ​ចោទ​ប្រកាន់​នេះ ដោយ​អះអាង​ថា ប្រទេស​ជប៉ុន​នៅតែ​ផ្តល់​ជំនួយ​ឥត​សំណង​ដល់​ប្រទេស​កម្ពុជា​ចំនួន ៧៤​លាន​ដុលា្លរ​ដើម្បី​សាងសង់​ស្ពាន​អ្នកលឿង​ដដែល។

លោក ឈាង វុន បាន​អះអាង​ថា ៖ «ប៉ុន្តែ​ការងារ​ជួយ​ធ្វើ​ស្ពាន​នេះ ជប៉ុន​នៅតែ​បន្ត​ទេ តែ​យើង​ត្រូវ​យល់​ថា ប្រទេស​គេ​ផ្ដល់​ជំនួយ​​ឲ្យ​យើង​ហ្នឹង​ក៏​គេ​ឆ្លងកាត់​វិបត្តិ​សេដ្ឋកិច្ច​និង​ហិរញ្ញវត្ថុ​ពិភពលោក​ដែរ ដែល​ជះ​ឥទ្ធិពល​ដល់​សេដ្ឋកិច្ច​​របស់​ប្រទេស​គេ អ៊ីចឹង​ហើយ​ធ្វើ​ឲ្យ​មាន​ការ​យឺតយ៉ាវ​ខ្លះ​ដែរ​ក្នុង​ការ​ផ្ដល់​ឥណទាន»

វិទ្យុ​អាស៊ីសេរី​មិន​អាច​ទាក់ទង​នឹង​មន្រ្តី​ស្ថានទូត​ជប៉ុន​ប្រចាំ​ប្រទេស​កម្ពុជា​ដើម្បី​សួរ​បញ្ជាក់​អំពី​បញ្ហា​នេះ​បាន​ទេ​នៅ​ថ្ងៃ​ទី​៣០ ធ្នូ​នេះ។

ទោះ​ជា​យ៉ាង​ណា លោក​តំណាង​រាស្ត្រ ឈាង វុន ក៏​មិន​អាច​បញ្ជាក់​បាន​ដែរ​ថា តើ​គេ​នឹង​ចាប់ផ្តើម​សាងសង់​ស្ពាន​អ្នកលឿង​នេះ​នៅ​ពេល​ណា​ដែរ គ្រាន់តែ​លោក​បាន​លើក​ឡើង​ថា​នៅ​ពេល​ឆាប់ៗ​ខាង​មុខ​នេះ៕

ព័ត៌មាន (2)
Share

អ្នក​អាន​អនាមិក

very good that donation from japan were delayed because of govenment not think about problem of people such as losed land losed home and govenment not give equal thire property that thire losed.
dont forget that govenment of Cambodia is belong to vietname so he not worry the misery of khmer people.
thanks from me yim sovannmakra

Dec 31, 2009 12:18 AM

អ្នក​អាន​អនាមិក

ពុករលួយ

Dec 30, 2009 11:22 PM

គេហទំព័រ​ទាំងមូល