ទាហាន​និង​អ្នក​ភូមិ​ខ្មែរ​៣​នាក់​ត្រូវ​សង្ស័យ​ថា​ទាហាន​ថៃ​ចាប់​ខណៈ​ចូល​ព្រៃ​កាប់​ឈើ

ប្រភព​ព័ត៌មាន​ពី​ខេត្ត​ឧត្តរមានជ័យ​ ឲ្យ​ដឹង​ថា ទាហាន​ម្នាក់​និង​ប្រជាពលរដ្ឋ​ខ្មែរ​៣​នាក់​ទៀត​នៅ​ភូមិ​ចំការចេក សង្កាត់​អូរស្មាច់ ក្រុង​សំរោង កំពុង​បាត់​ខ្លួន​នៅ​ក្នុង​ព្រៃ​​ជាប់​ព្រំដែន​ស្រុក​កាប់ជើង ខេត្ត​សុរិន្ទ​របស់​ថៃ ខណៈ​ដែល​អ្នក​ភូមិ​ខ្មែរ​ទាំង​នោះ​បាន​លួច​ចូល​ទៅ​កាប់​ឈើ​គ្រញូង​មក​លក់​ដូរ​ហើយ​ត្រូវ​គេ​សង្ស័យ​ថា អាច​ត្រូវ​ទាហាន​ថៃ​ចាប់​ខ្លួន។
ដោយ ហង្ស សាវយុត
2009-12-30
អ៊ីម៉ែល
មតិ
Share
បោះពុម្ព

ប្រជាពលរដ្ឋ​មួយ​រូប​នៅ​ឃុំ​អូរស្មាច់ សុំ​មិន​បញ្ចេញ​ឈ្មោះ​បាន​អះអាង​កាល​ពី​ព្រឹក​ថ្ងៃ​ពុធ ទី​៣០ ខែ​ធ្នូ​ថា ទាហាន​ខ្មែរ​ម្នាក់​នៅ​ក្នុង​វរលេខ​៤០២​និង​ប្រជាពលរដ្ឋ​ខ្មែរ​៣​នាក់​ទៀត​​កំពុង​បាត់​ខ្លួន​ក្នុង​ព្រៃ​តាំង​ពី​យប់​ថ្ងៃ​ទី​២៩ ខែ​ធ្នូ ហើយ​ក្រុម​គ្រួសារ​អ្នក​បាត់​ខ្លួន​ទាំង​នោះ​កំពុង​ស្វែង​រក តែ​រហូត​មក​ដល់​រសៀល​ថ្ងៃ​ទី​៣០ ធ្នូ មិន​ទាន់​បាន​ដំណឹង​យ៉ាង​ណា​នៅ​ឡើយ​ទេ។

ប្រជាពលរដ្ឋ​សុំ​មិន​បញ្ចេញ​ឈ្មោះ​បាន​ឲ្យ​ដឹង​ដូច្នេះ ៖ «បាត់​៤​នាក់ ម៉ោង​៩​និង​១៥​នាទី​យប់​ថ្ងៃ​ទី​២៩ ចំណុច​អូរខ្លាឃ្មុំ។ ទៅ​កាប់​ឈើ​គ្រញូង ប៉ុន្តែ​អា​គ្រញូង​នៅ​ម្តុំ​ហ្នឹង​វា​អត់​សូវ​មាន​ទេ វា​ច្រើន​តែ​ក្រាក់​ក្រញូង។ ក្រុម​គ្រួសារ​ហ្នឹង​កំពុង​ទាក់ទង។ ទោះ​យ៉ាង​ណា​មន្ត្រី​សាលា​ខេត្ត​ឧត្តរមានជ័យ មិន​ទាន់​បាន​ដឹង​អំពី​ការ​បាត់​ខ្លួន​ទាហាន​និង​អ្នក​ភូមិ​ខ្មែរ​ទាំង​នោះ​នៅ​ឡើយ​ទេ»

ជំនួយការ​អភិបាល​ខេត្ត​ឧត្តរមានជ័យ លោក ឈឹម ស៊ីវុធ បាន​មាន​ប្រសាសន៍​ថា លោក​មិន​ទាន់​បាន​ទទួល​សេចក្តី​រាយ​ការណ៍​ណា​មួយ​​ពី​អាជ្ញាធរ​ខ្មែរ​ប្រចាំ​ព្រំដែន​ស្តី​ពី​ការ​បាត់​ខ្លួន​នោះ​នៅ​ឡើយ​ទេ ហើយ​លោក​នឹង​ចាប់​ផ្តើម​ស្រាវជ្រាវ​ព័ត៌មាន​នោះ។

លោក ឈឹម ស៊ីវុធ មាន​ប្រសាសន៍​ដូច្នេះ ៖ «អត់​បាន​ដឹង​ថា​យ៉ាង​ម៉េច ចាំ​មើល​ក្រែង​ព័ត៌មាន​វា​មិន​ទាន់​ពិស្តារ គេ​អត់​ទាន់​យក​ច្បាស់ គេ​មិន​ទាន់​ឲ្យ​ខ្ញុំ​ដឹង»

ចំណែក​ប្រធាន​ប៉ុស្តិ៍​នគរបាល​រដ្ឋបាល​ប្រចាំ​សង្កាត់​អូរស្មាច់ លោក​អនុ​សេនីយ៍​ត្រី ម៉ាក បូរិន បាន​មាន​ប្រសាសន៍​ថា ពិត​ជា​មាន​ការ​បាត់​ខ្លួន​ទាហាន​ខ្មែរ​ម្នាក់​និង​អ្នក​ភូមិ​៣​នាក់​មែន នៅ​ម្តុំ​ច្រក​ព្រំដែន​ខ្មែរ-​ថៃ ចំណុច​អូរខ្លាឃ្មុំ ហើយ​លោក​បាន​សាកសួរ​ទៅ​មន្ត្រី​ព្រំដែន​ខ្មែរ​បាន​ឆ្លើយ​តប​ថា កំពុង​សង្ស័យ​ថា ទាហាន​ថៃ​នៃ​ស្រុក​កាប់ជើង ខេត្ត​សុរិន្ទ ចាប់​ខ្លួន​យក​ទៅ​នៅ​ពេល​ដែល​ទាហាន​ថៃ​បាន​ពួន​ស្ទាក់​ចាំ​ត្រង់​តំបន់​នោះ។

លោក ម៉ាក បូរិន្ទ មាន​ប្រសាសន៍​ថា ៖ «ហៅ​អូរខ្លាឃ្មុំ នៅ​ភាគ​ខាងលិច​មាត់​ច្រក​ហ្នឹង​ប្រហែល​១​គីឡូ។ វា​នៅ​ចាំ​ច្រក​ហ្នឹង ព្រោះ​ផ្តល់​ទំនាក់​ទំនង​ថា មាន​ចាប់​ដែរ​យប់​មិញ (២៩ ធ្នូ) ប៉ុន្តែ​ខាង​ព្រំដែន ខ្ញុំ​ទាក់​ទង​អត់​ទាន់​បាន។ ព្រឹក​មិញ​(៣០ ធ្នូ) ជួប​គាត់​ដែរ ប៉ុន្តែ​គាត់​ថា អត់​ទាន់​បាន​ឈ្មោះ»

មន្ត្រី​នគរបាល​ខ្មែរ​ប្រចាំ​​សង្កាត់​អូរស្មាច់ ក្រុង​សំរោង ខេត្ត​ឧត្តរមានជ័យ បាន​ឲ្យ​ដឹង​ថា ចាប់​តាំង​ពី​ដើម​ឆ្នាំ​២០០៩ រហូត​មក​ដល់​ពេល​នេះ មាន​ប្រជាពលរដ្ឋ​ខ្មែរ​ចំនួន​ឡើង​ដល់​១៤​នាក់​ហើយ​ដែល​ទាហាន​ថៃ​ចាប់​ខ្លួន​យក​ទៅ​កាត់​ទោស ដោយសារ​ឆ្លង​ដែន​ចូល​ទៅ​ក្នុង​ទឹកដី​ថៃ​ទាក់ទិន​នឹង​ការ​រក​ស៊ី​ឈើ​ខុស​ច្បាប់​នោះ៕

ព័ត៌មាន (1)
Share

អ្នក​អាន​អនាមិក

The government khmer should create more jobs or provide enough land for khmer people that they can produce crop for each family so they do not want to cross the boder any more.We have alot of land for farmer.

Dec 31, 2009 01:05 PM

គេហទំព័រ​ទាំងមូល